Özbəkistan ən böyük 10 ticarət tərəfdaşını açıqladı

Özbəkistan 2026-cı ilin yanvar–avqust aylarında dünyanın 200-dən çox ölkəsi ilə ticarət əlaqələrini davam etdirib. Milli Statistika Komitəsinin məlumatına görə, ölkənin ən böyük ticarət tərəfdaşları Çin, Rusiya və Qazaxıstan olub.

Çinin payına Özbəkistanın xarici ticarət dövriyyəsinin 13,2 milyard dolları düşüb. Rusiya 9,2 milyard dollarla ikinci yeri tutub, Qazaxıstanla ticarət həcmi isə 3,7 milyard dollar təşkil edib.

İlk beşliyə Türkiyə (1,9 milyard dollar) və Əfqanıstan (1,4 milyard dollar) da daxil olub. Ən böyük on tərəfdaş siyahısında Koreya Respublikası (1,3 milyard dollar), Fransa və Birləşmiş Ərəb Əmirlikləri (hər biri 1,2 milyard dollar), Çinin xüsusi inzibati rayonu Honkonq (980,1 milyon dollar) və Qırğız Respublikası (908,4 milyon dollar) da yer alıb. Özbəkistanın ilk səkkiz ayda ümumi xarici ticarət dövriyyəsi 57,4 milyard dollar olub.