Кыргызстан 2030-жылга чейин демографиялык абалды кантип жакшыртууну пландап жатат

Кыргызстанда 2026–2030-жылдарга карата демографиялык саясаттын негизги багыттары аныкталды. Бийлик үй-бүлөлөрдүн турмуш шартын жакшыртууну, билим берүү жана саламаттык сактоо кызматтарына жеткиликтүүлүктү кеңейтүүнү жана ата-энелер үчүн кошумча жумуш мүмкүнчүлүктөрүн түзүүнү пландап жатат. Бул тууралуу Эмгек, социалдык камсыздоо жана миграция министрлиги билдирди.

16-октябрда Министрлер кабинетинин жанындагы Демографиялык саясат боюнча Консультативдик кеңештин биринчи жыйыны өттү. Кеңеш 2040-жылга чейинки Кыргызстандын Демографиялык саясат концепциясын ишке ашырууну координациялоо максатында 1-октябрда түзүлгөн. Жыйында өлкөдөгү демографиялык абал, учурдагы көйгөйлөр жана кийинки беш жылда ишке ашырылуучу иш-чаралар талкууланды.

Планга ылайык, төрөлгөндөн үч жашка чейинки балдарга ай сайынкы жардам акы системасын өнүктүрүү, жыл сайын ар бири 240 орундуу 115 балбакча куруу, мектепке чейинки билим берүү камтуусун 80 пайызга жеткирүү, кеминде эки жаңы аймактык перинаталдык борбор ачуу жана кеминде 15 ата-энелүүлүккө даярдоо мектебин түзүү каралган. Релизде каржылоонун жалпы көлөмү так көрсөтүлгөн эмес.