Қырғызстан 2030 жылға дейін демографиялық жағдайды қалай жақсартуды жоспарлап отыр

Қырғызстанда 2026–2030 жылдарға арналған демографиялық саясаттың негізгі бағыттары айқындалды. Билік отбасылардың өмір сүру жағдайын жақсартуды, білім беру мен денсаулық сақтау қызметтеріне қолжетімділікті кеңейтуді және ата-аналар үшін қосымша жұмыс мүмкіндіктерін жасауды жоспарлап отыр. Бұл туралы Еңбек, әлеуметтік қамсыздандыру және көші-қон министрлігі хабарлады.

16 қазанда Министрлер кабинеті жанындағы Демографиялық саясат жөніндегі кеңесші кеңестің алғашқы отырысы өтті. Кеңес 2040 жылға дейінгі Қырғызстанның демографиялық саясат тұжырымдамасын іске асыруды үйлестіру мақсатында 1 қазанда құрылды. Отырыста елдегі демографиялық жағдай, бар мәселелер және алдағы бес жылда жүзеге асырылатын шаралар талқыланды.

Жоспарға сәйкес, туғаннан үш жасқа дейінгі балаларға ай сайынғы жәрдемақы жүйесін дамыту, жыл сайын әрқайсысы 240 орындық 115 балабақша салу, мектепке дейінгі білім беру қамтуын 80 пайызға жеткізу, кемінде екі жаңа өңірлік перинаталдық орталық ашу және кемінде 15 ата-аналыққа дайындық мектебін құру көзделген. Релизде қаржыландырудың жалпы көлемі нақтыланбаған.