Кыргызстанда стратегиялык маанидеги ири долбоорлор ишке ашырылууда

Кыргызстанда транспорт, энергетика, туризм жана инвестиция тартуу багыттарында Борбордук Азия үчүн стратегиялык мааниге ээ болгон ири долбоорлор ишке ашырылууда. Алардын катарында Кытай–Кыргызстан–Өзбекстан темир жолу, Камбар-Ата-1 ГЭСи, CASA-1000 долбоору, “Асман Сити” жана “Ала-Тоо Резорт” туристтик комплекси бар. Бул тууралуу “Кабар” агенттигине Президентке караштуу Инвестициялар боюнча улуттук агенттиктин башчысы Равшанбек Сабиров билдирди.

Анын айтымында, аталган долбоорлор өлкөнүн транспорттук байланыштарын кеңейтүүгө, энергетикалык мүмкүнчүлүктөрүн чыңдоого, туризмди өнүктүрүүгө жана чет өлкөлүк инвестицияларды тартууга багытталган. Кытай–Кыргызстан–Өзбекстан темир жолу Азия менен Европанын ортосундагы транспорттук байланышты кеңейтүүгө өбөлгө түзөт, ал эми Камбар-Ата-1 ГЭСи жана CASA-1000 долбоору энергетика тармагындагы кызматташууну өнүктүрүүгө багытталган. Ошондой эле экологиялык жактан таза “Асман Сити” шаарын куруу жана “Ала-Тоо Резорт” тоо-лыжа кластерин өнүктүрүү боюнча иштер жүрүп жатат, ал эми “Тамчы” атайын финансылык-инвестициялык аймагы эл аралык капиталды тартууга багытталган.

Сабиров инвестициялык долбоорлорду ишке ашыруу менен катар өлкөнүн эл аралык абройун чыңдоого да көңүл бурулууда экенин белгиледи. Бул багытта VI Дүйнөлүк көчмөндөр оюндарынын өткөрүлүшү, Кыргызстандын 2027–2028-жылдарга БУУнун Коопсуздук Кеңешине шайланышы жана өлкөнүн Европа Биримдигинин авиациялык “кара тизмесинен” чыгарылышы маанилүү окуялардын катарында белгиленди. Мындан тышкары, 2026-жылдын башынан бери жалпы суммасы 3 млрд доллар болгон 29 инвестициялык макулдашууга кол коюлду.