Qırğızıstanda strateji əhəmiyyətli iri layihələr həyata keçirilir

Qırğızıstan nəqliyyat, enerji, turizm və investisiya cəlbi sahələrində Mərkəzi Asiya üçün strateji əhəmiyyət kəsb edən iri layihələri həyata keçirir. Prezidentə tabe Milli İnvestisiya Agentliyinin rəhbəri Ravşanbek Sabirov “Kabar” agentliyinə bildirib ki, layihələr arasında Çin–Qırğızıstan–Özbəkistan dəmir yolu, Kambar-Ata-1 HES, CASA-1000 layihəsi, həmçinin “Asman City” və “Ala-Too Resort” turist kompleksləri var.

Sabirovun sözlərinə görə, layihələr ölkənin nəqliyyat əlaqələrini genişləndirmək, enerji imkanlarını gücləndirmək, turizmi inkişaf etdirmək və xarici investisiyaları cəlb etmək məqsədi daşıyır. Dəmir yolunun Asiya ilə Avropa arasında nəqliyyat əlaqəsini genişləndirməyə kömək edəcəyi, Kambar-Ata-1 və CASA-1000-in isə enerji sahəsində əməkdaşlığın inkişafına yönəldiyi bildirilib. Həmçinin “Asman City” şəhərinin tikintisi və “Ala-Too Resort” xizmət klasterinin inkişafı üzrə işlər davam edir, “Tamçı” xüsusi maliyyə-investisiya zonasının yaradılması isə beynəlxalq kapitalı cəlb etməyə yönəlib.

Sabirov əlavə edib ki, investisiya layihələri ilə yanaşı ölkənin beynəlxalq nüfuzunun gücləndirilməsinə də diqqət yetirilir. Bu baxımdan VI Dünya Köçəri Oyunlarının keçirilməsi, Qırğızıstanın 2027–2028-ci illər üçün BMT Təhlükəsizlik Şurasına seçilməsi və ölkənin Avropa Birliyinin aviasiya “qara siyahısından” çıxarılması əhəmiyyətli hadisələr sırasında qeyd edilib. 2026-cı ilin əvvəlindən bəri ümumi məbləği 3 milyard dollar olan 29 investisiya razılaşması imzalanıb.