Садыр Жапаров ТүркПАга мүчө мамлекеттердин парламент спикерлерин кабыл алды

Кыргызстандын Президенти Садыр Жапаров 20-октябрда Түрк мамлекеттеринин парламенттик ассамблеясынын (ТүркПА) Кеңешинин 15-пленардык отурумунун алкагында ТүркПАга мүчө мамлекеттердин парламенттеринин спикерлерин кабыл алды. Бул тууралуу президенттин администрациясынын маалымат саясаты кызматы кабарлады.

Президент жолугушууну бир тууган мамлекеттер ортосундагы достуктун жана өз ара ишенимдин ачык көрсөткүчү деп атап, Кыргызстандын ТүркПА алкагында кызматташтыкты өнүктүрүүгө кызыкдар экенин ырастады. Анын сөзүнчө, Ассамблеянын иши бир тууган мамлекеттер ортосундагы байланыштарды бекемдөөгө жана соода-экономикалык, транспорттук, энергетикалык, санариптик жана гуманитардык чөйрөлөрдө кызматташтыкты тереңдетүүгө багытталган.

Спикерлер Садыр Жапаровго жылуу тосуп алгандыгы үчүн ыраазычылык билдирип, Кыргызстандын түрк дүйнөсүнүн биримдигин бекемдөөдөгү маанилүү ролун белгилешти. Алар ТүркПАнын парламенттер аралык өз ара аракеттенүүдөгү, интеграциялык процесстерди колдоодогу жана кызматташтыкты кеңейтүүдөгү маанисине басым жасашты. Жолугушууда Түрк мамлекеттеринин уюмунун алкагында байланыштарды бекемдөөгө, ошондой эле түрк элдеринин жалпы баалуулуктарын жана улуттук инсандыгын сактоого өзгөчө көңүл бурулду.