Борбордук Азия менен АКШнын тышкы иштер министрлери Самарканда «C5+1» форматында жолукту

2026-жылдын 19-октябрында Самарканд шаарында Борбордук Азия өлкөлөрүнүн тышкы иштер министрлери менен АКШнын Мамлекеттик катчысы «C5+1» форматындагы кезектеги жолугушууну өткөрүштү. Бул тууралуу Түркмөнстандын Тышкы иштер министрлиги кабарлады.

Жолугушууда катышуучулар Борбордук Азия менен АКШ ортосундагы көп тараптуу кызматташтыкты чыңдоо жана аймактык өз ara аракеттенүүнүн келечегин талкуулашты. Тараптар эгемендикке, көз каранды эместикке жана аймактык бүтүндүккө негизделген узак мөөнөттүү өнөктөштүккө берилгендигин ырасташты. Саясий диалогду кеңейтүү, коңшулук мамилелер жана Борбордук Азияда тынчтыкты, туруктуулукту жана туруктуу өнүгүүнү камсыз кылууга багытталган биргелешкен демилгелерге өзгөчө көңүл бурулду.

Соода-экономикалык жана инвестициялык кызматташтык, анын ичинде Транскаспий эл аралык транспорт багыты аркылуу транспорттук-логистикалык байланыштар маанилүү орунду ээледи. Санариптик экономика, жасалма интеллект, энергетика жана табигый ресурстар да талкууга алынды. Коопсуздук маселелеринде терроризмге, уюшкан кылмышка, баңги заттарынын жана куралдын жашыруун айлануусуна, адам соодасына жана чек ара коопсуздугуна каршы күрөш, ошондой эле ядролук коопсуздук маселелери каралды. Жолугушуунун жыйынтыгы боюнча «C5+1» форматын чыңдоо боюнча биргелешкен билдирүү кабыл алынды.