Mərkəzi Asiya və ABŞ xarici işlər nazirləri Səmərqənddə “C5+1” formatında görüşüb

19 oktyabr 2026-cı il tarixində Səmərqənddə Mərkəzi Asiya ölkələrinin xarici işlər nazirləri ilə ABŞ Dövlət katibi “C5+1” formatında növbəti görüş keçirib. Bu barədə Türkmənistanın Xarici İşlər Nazirliyi məlumat verib.

Görüşdə iştirakçılar Mərkəzi Asiya ilə ABŞ arasında çoxşaxəli əməkdaşlığın daha da möhkəmləndirilməsini və regional qarşılıqlı fəaliyyətin perspektivlərini müzakirə ediblər. Tərəflər suverenlik, müstəqillik və ərazi bütövlüyü prinsiplərinə əsaslanan uzunmüddətli tərəfdaşlığa sadiqliklərini təsdiqləyiblər. Siyasi dialoqun genişləndirilməsi, qonşuluq münasibətləri və regionda sülh, sabitlik və davamlı inkişafa yönəlmiş birgə təşəbbüslər diqqət mərkəzində olub.

Ticarət, investisiya və Transxəzər beynəlxalq nəqliyyat marşrutu daxil olmaqla nəqliyyat əlaqələri əsas mövzulardan olub. Rəqəmsal iqtisadiyyat, süni intellekt, enerji və təbii ehtiyatlar üzrə əməkdaşlıq da müzakirə edilib. Təhlükəsizlik sahəsində terrorizm, mütəşəkkil cinayətkarlıq, narkotik və silah qaçaqmalçılığı, insan alveri və sərhəd təhlükəsizliyi, eləcə də nüvə təhlükəsizliyi məsələləri nəzərdən keçirilib. Görüşün yekununda “C5+1” formatının möhkəmləndirilməsinə dair Birgə Bəyanat qəbul edilib.