Садыр Жапаров Кыргызстандын кийинки беш жылга стратегиялык өнүгүү артыкчылыктарын айтты

Кыргыз Республикасынын Президенти Садыр Жапаров 21-октябрда Бишкекте өткөн республикалык кеңешмеде өлкөнүн кийинки беш жылга социалдык-экономикалык өнүгүүсүнүн стратегиялык милдеттерин аныктады. Иш-чарага мамлекеттик органдардын жана мекемелердин жетекчилери катышып, 2030-жылдын аягына чейинки мамлекеттик саясаттын негизги артыкчылыктары белгиленди.

Президент сөзүндө өткөн беш жылда мамлекеттик институттардын активдүү калыбына келтирилгенин, экономикалык өнүгүүнүн бекем негизи түзүлгөнүн жана коомдук-маданий турмуштун бардык чөйрөсүндө ири өзгөртүүлөр ишке ашырылганын белгиледи. Ал өлкөнүн жаңы өнүгүү баскычына өткөнүн, эми ар бир үй-бүлөнүн турмушун жакшыртууга, узак мөөнөттүү туруктуу өнүгүүнү камсыз кылууга жана келечек муундар үчүн күчтүү мамлекет курууга багыт алынганын айтты.

Жарыяланган принциптердин арасында мамлекеттин социалдык-экономикалык өзгөрүүлөрдүн стратеги жана архитектору болушу, жеке менчикти коргоо, социалдык саясаттын борборунда үй-бүлө менен бала турушу, ачык жана жоопкерчиликтүү ишкерлерди мамлекет тарабынан толук коргоо жана аймактардын гүлдөшү бар. Экономикалык өсүш жогорку кошумча баалуулугу бар кызматтар жана кайра иштетүү өнөр жайынын өнүмдөрүнүн экспортуна негизделген модель негизинде болоорун белгиледи.