Садыр Жапаров жеке менчикти жана ишкерликти коргоого убада берди

Президент Садыр Жапаров укук коргоо органдарынан ишкерлерге басымды токтотууну талап кылды. Анын айтымында, укук коргоо органдары жеке менчикти жана мыйзамдуу ишкердикти коргоонун негизги институттарынын бири болушу керек. Ал бул жөнүндө Бишкекте мурунку күнү өткөн республикалык кеңешмеде билдирди.

Мамлекет башчысы экономикалык процесстерге негизсиз кийлигишүүнү жоюу жана бизнеске мыйзамсыз басымды токтотуу зарылдыгын баса белгиледи. Маселени системалуу чечүү үчүн жеке менчикти коргоо жана ишкерликти колдоо боюнча бирдиктүү концепция иштелип чыгат. Укук коргоо органдарынын иши президенттин жеке катышуусу менен үзгүлтүксүз каралат.

Жапаров ошондой эле бизнеске кайрылып, ишкердиктин эркиндиги мыйзамдын, коомдун жана мамлекеттин алдындагы жоопкерчиликтен бошотууну билдирбейт экенин белгиледи. «Бизнес продукциянын коопсуздугун камсыздоого, ылайыктуу эмгек шарттарын түзүүгө, экологияны коргоого жана салыктарды адал төлөөгө милдеттүү», — деп белгиледи президент.