Qirgʻiziston prezidenti xususiy mulk va biznesni himoya qilishga vaʼda berdi

Qirgʻiziston prezidenti Sadir Japarov huquqni muhofaza qilish organlaridan tadbirkorlarga bosimni toʻxtatishni talab qildi. Uning soʻzlariga koʻra, bu organlar xususiy mulk va qonuniy tadbirkorlik faoliyatini himoya qiluvchi asosiy institutlardan biriga aylanishi kerak. U buni Bishkekda bir kun oldin oʻtkazilgan respublika yigʻilishida bildirdi.

Davlat rahbari iqtisodiy jarayonlarga asossiz aralashuvni bartaraf etish va biznesga noqonuniy bosimga chek qoʻyish zarurligini taʼkidladi. Masalani tizimli hal qilish uchun xususiy mulkni himoya qilish va tadbirkorlikni qoʻllab-quvvatlashning yagona konsepsiyasi ishlab chiqiladi. Huquqni muhofaza qilish organlarining faoliyati prezidentning shaxsiy ishtirokida muntazam koʻrib chiqiladi.

Japarov shuningdek biznesga murojaat qilib, tadbirkorlik erkinligi qonun, jamiyat va davlat oldidagi masʼuliyatdan ozod boʻlishni anglatmasligini aytdi. «Biznes mahsulot xavfsizligini taʼminlashi, munosib mehnat sharoitlari yaratishi, ekologiyani asrashi va soliqlarni vijdonan toʻlashi shart», — dedi prezident.