Токаев: Конституция көп улуттуу элибиздин жаңы Жаргысына айланды

Мамлекет башчысы Касым-Жомарт Токаев Республика күнүнө арналган салтанаттуу жыйында сүйлөгөн сөзүндө адилеттүү Казакстан жөнүндө сөз кылды. Бул жөнүндө Egemen.kz Акорда басма сөз кызматына шилтеме кылып кабарлайт. Токаев бирдиктүү коом катары адилеттүү Казакстанды куруу иши колго алынганын жана адилеттүүлүк принциптери эл арасында жайылтылып жатканын белгиледи. Жаңы партияга «Адилет» деген ат берилгенин айтты.

Мамлекет башчысы тарыхый процесстерге адилеттүү көз карап, туура баа берүү керектигин айтты. Көз карандысыз Казакстандын негизин салууда Биринчи Президент Нурсултан Назарбаевдин ысымы эч качан унутулбайт деди. Ынтымак менен туруктуулуктун аркасында өлкө көптөгөн сынактардан өткөнүн айткан Токаев, бирдиктүү эл болуп кабыл алынган Конституциянын көп улуттуу элдин жаңы Жаргысына айланганын белгиледи.

Мамлекет башчынын айтымында, Конституциянын ар бир принциби жана ар бир беренеси элдин кызыкчылыгына кызмат кылат. Өлкөнүн эгемендиги, аймактык бүтүндүгү, жарандардын мыйзамдуу укуктары жана эркиндиктери негизги баалуулуктар катары таанылды. Республика күнүнүн алдында Президент өлкөнүн өнүгүүсүнө салым кошкон жарандарды сыйлыктады.