Қасым-Жомарт Тоқаев: Конституция көпұлтты жұртымыздың жаңа Жарғысына айналды

Мемлекет басшысы Қасым-Жомарт Тоқаев Республика күніне арналған салтанатты жиындағы сөзінде әділетті Қазақстан туралы айтты. Бұл туралы Egemen.kz Ақорда баспасөз қызметіне сілтеме жасап хабарлайды. Тоқаев біртұтас қоғам болып әділетті Қазақстанды құру ісі қолға алынғанын, әділеттілік қағидаттары халық арасында дәріптеліп жатқанын атап өтті. Жаңа партияға «Әділет» атауы берілгенін айтты.

Мемлекет басшысы тарихи үрдістерге әділ көзбен қарап, әділ баға беру керектігін айтты. Егемен Қазақстанның негізін қалаған Тұңғыш Президент Нұрсұлтан Әбішұлы Назарбаевтың есімі ешқашан ұмытылмайтынын атап өтті. Татулық пен тұрақтылықтың арқасында ел сан түрлі сынақтан өткенін айтқан Тоқаев, біртұтас ел болып қабылданған Конституцияның көпұлтты жұртымыздың жаңа Жарғысына айналғанын атап көрсетті.

Мемлекет басшысының айтуынша, Конституцияның әр қағидаты ел мүддесіне қызмет етеді. Еліміздің егемендігі, жеріміздің тұтастығы, азаматтардың заңды құқықтары мен бостандықтары негізгі құндылықтар деп танылды. Республика күні қарсаңында Президент ел дамуына үлес қосқан азаматтарды марапаттады.