Кыргызстанда үй-бүлөлүк зомбулук үчүн 14 суткага чейин камак сунушталууда

Кыргызстанда үй-бүлөлүк зомбулук үчүн жазаны катаалдаштыруу сунушталып, тиешелүү мыйзам долбоору коомдук талкууга коюлду. Укук бузуулар жөнүндөгү кодекске киргизилүүчү өзгөртүүгө ылайык, үй-бүлөдөгү физикалык зомбулук 70-беренесинин өзүнчө бөлүгү болуп, кылмыш белгилери жок болсо, 7–14 суткага чейин административдик камак менен жазаланат. Психологиялык жана экономикалык зомбулук, коркутуу, аңдуу жана көңүл бурбоо үчүн учурдагы жаза – 40 саат коомдук иш же 3–7 суткага камак – сакталат.

Милицияга шектүү агрессордан соттун чечимин күтпөстөн, окуя болгон жеринде курал алып коюу укугу берилиши сунушталууда. Курал алгач бир айга чейин алынып, соттун чечими менен үч айга чейин узартылышы мүмкүн. Соттор үй-бүлөлүк зомбулук жасаган адамдарга спирттүү ичимдиктерди, баңгизатты жана психотроптук заттарды колдонууга тыюу сала алат. Кайталанма зомбулукта жана жогорку тобокелдик учурунда сот айыпкерди түзөтүү программасына жиберүүгө милдеттүү. Башкалардын өмүрүнө жана ден-соолугуна коркунуч туудурган адамды кармоо мөөнөтү 48 саатка чейин узартылышы мүмкүн, бирок ал бир суткада сотко жеткирилиши керек.

Кылмыш кодексине да өзгөртүүлөр сунушталып, жеңил ден-соолукка зыян келтирген үй-бүлөлүк зомбулук үчүн 40–100 саат коомдук иш же 2 жылга чейин эркинен ажыратуу каралат. Зордуктоо беренесинде эркин макулдуктун жоктугу чечүүчү мааниге ээ экени, физикалык каршылык көрсөтүлбөгөндүгү макулдук катары эсептелбей тургандыгы бекитилиши сунушталууда. Авторлор Ички иштер министрлигинин маалыматтарына таянып, 2023-жылы 14 020, 2024-жылы 18 081, 2025-жылы 23 516 үй-бүлөлүк зомбулук боюнча кайрылуу катталганын жана бул эки жыл мурдагыдан 67,7% көп экенин билдиришет.