Qirgʻizistonda oilaviy zoʻravonlik uchun 14 kungacha hibs taklif qilindi

Qirgʻizistonda oilaviy zoʻravonlikka qarshi jazolarni kuchaytirish taklif etilmoqda, tegishli qonun loyihasi jamoatchilik muhokamasiga qoʻyildi. Huquqbuzarliklar toʻgʻrisidagi kodeksga kiritilishi rejalashtirilgan oʻzgartirishga koʻra, oilada jismoniy zoʻravonlik 70-moddaning alohida qismi sifatida ajratiladi va jinoyat belgilari boʻlmasa, 7 dan 14 kungacha hibsga olish bilan jazolanadi. Psixologik va iqtisodiy zoʻravonlik, tahdidlar, taqibʼ qilish va eʼtiborsiz munosabat uchun esa mavjud jazo – 40 soat jamoat ishlari yoki 3 dan 7 kungacha hibs – saqlanib qoladi.

Politsiyaga gumon qilinayotgan zoʻravonlik sodir etgan shaxsdan sud qarorini kutmasdan, joyida qurolni darhol olib qoʻyish huquqi berish taklif qilinmoqda. Qurol dastlab bir oygacha olib qoʻyiladi, sud qarori bilan esa uch oygacha uzaytirilishi mumkin. Sudlar huquqbuzarlarga alkogol, narkotik va psixotrop moddalarni isteʼmol qilishni taqiqlashi mumkin; takroriy zoʻravonlik va yuqori xavf holatlarida esa ularni tuzatish dasturiga yoʻnaltirish majburiy boʻladi. Boshqalarning hayoti va sogʻligiga tahdid soluvchi shaxslarni ushlab turish muddati 48 soatgacha uzaytirilishi mumkin, biroq ular bir sutka ichida sudga topshirilishi kerak.

Jinoyat kodeksiga oʻzgartirishlar kiritilib, yengil sogʻliqqa zarar yetkazgan oilaviy zoʻravonlik uchun 40 dan 100 soatgacha jamoat ishlari yoki ikki yilgacha ozodlikdan mahrum qilish nazarda tutilmoqda. Zoʻrlash moddasida erkin rozilikning yoʻqligi hal qiluvchi ekani, jismoniy qarshilik koʻrsatmaslik esa rozilik sifatida qaralmasligi belgilanishi taklif etilgan. Mualliflar Ichki ishlar vazirligi maʼlumotlariga tayangan holda 2023-yilda 14 020, 2024-yilda 18 081 va 2025-yilda 23 516 ta oilaviy zoʻravonlik boʻyicha murojaat qayd etilganini, bu ikki yil oldingiga nisbatan 67,7 foiz koʻp ekanini bildirishadi.