Өзбекстанда банктар жана нотариустар электрондук документтерди кабыл алат

Өзбекстанда бир катар кызматтарды алганда жарандар кагаз көчүрмөлөрдүн ордуна документтердин электрондук версияларын тапшыра алышат. Бул тууралуу Адилет министрлиги билдирди. Тиешелүү ведомстволук документтер 20-октябрда катталган, ошонун негизинде 33 ведомстволук документке өзгөртүүлөр жана толуктоолор киргизилген.

Биометрикалык паспорттун, ID-картанын, туулганы жөнүндө жана неке күбөлүктөрүнүн, пенсия күбөлүгүнүн, майыптык жөнүндө маалымкаттын, согуш катышуучусунун күбөлүктөрүнүн жана студенттик билеттин электрондук версияларын my.gov.uz порталы жана «Ижтимоий карта» мобилдик тиркемеси аркылуу көрсөтүүгө болот. Электрондук документтер банк кызматтарында жана айрым финансылык операцияларда жеке адамды ырастоодо, нотариалдык аракеттерде, ички авиарейстерге катталганда, согуш катышуучуларына компенсация төлөгөндө жана телекоммуникация кызматтарына келишимдерди түзгөндө кабыл алынат.

Ошондой эле кан жана анын компоненттерин тапшыруучу донорлордун жеке маалыматын ырастоодо, ломбарддар менен келишимдерди түзүүдө, социалдык-медициналык мекемелерде акылуу кызматтарды алганда жана аскердик эсепке коюлганда колдонулат. Электрондук документтерди башка бир катар кызматтарды алууда да колдонууга болот.