Кыргызстан Си Цзиньпиндин визити жана ШКУга төрагалыгын талкуулады

Кыргызстандын Тышкы иштер министрлигинде 27-октябрда коллегиянын жыйыны өттү. Жыйында Кытай Элдик Республикасынын Төрагасы Си Цзиньпиндин мамлекеттик сапарынын жана Кыргызстандын Шанхай кызматташтык уюмуна (ШКУ) төрагалык кылуусунун жыйынтыктары талкууланды. Бул тууралуу министрликтин басма сөз кызматы кабарлады.

Талкууда Кыргызстан менен Кытайдын ортосундагы саясий, соода-экономикалык, инвестициялык, транспорт-логистикалык жана маданий тармактардагы мамилелердин өнүгүүсү каралды. Ошондой эле ШКУга мүчө мамлекеттердин кызматташтыгы, аймактык коопсуздук, туруктуу өнүгүү жана биргелешкен демилгелерди ишке ашыруу маселелери талкууланды.

Жыйында министрликтин келишимдерди аткаруу боюнча артыкчылыктары аныкталып, структуралык бөлүмдөргө тиешелүү тапшырмалар берилди. Бирок министрликтин билдирүүсүндө конкреттүү чечимдер, иш-чаралар жана аларды ишке ашыруу мөөнөттөрү көрсөтүлгөн эмес.