Qirgʻiziston Si Szinpin tashrifi va ShHT raisligi natijalarini muhokama qildi

Qirgʻiziston Tashqi ishlar vazirligida 27 oktabr kuni kollegiya yigʻilishi boʻlib oʻtdi. Yigʻilishda Xitoy Xalq Respublikasi Raisi Si Szinpinning davlat tashrifi hamda Qirgʻizistonning Shanxay hamkorlik tashkiloti (ShHT) raisligi natijalari muhokama qilindi. Bu haqda vazirlik matbuot xizmati xabar berdi.

Muhokamada Qirgʻiziston va Xitoy oʻrtasidagi siyosiy, savdo-iqtisodiy, investitsiya, transport-logistika va madaniy sohalardagi aloqalarning rivojlanishi koʻrib chiqildi. Shuningdek, ShHT aʼzo davlatlarining hamkorligi, mintaqaviy xavfsizlik, barqaror rivojlanish va qoʻshma tashabbuslarni amalga oshirish masalalari ham muhokama qilindi.

Yigʻilishda vazirlikning erishilgan kelishuvlarni bajarish boʻyicha ustuvor yoʻnalishlari belgilandi hamda tuzilmaviy boʻlinmalarga tegishli topshiriqlar berildi. Biroq vazirlik xabarida aniq qarorlar, chora-tadbirlar va ularni amalga oshirish muddatlari koʻrsatilmagan.