Кыргызстан менен БУУ инвестиция тартуу боюнча кызматташууну талкуулады

Кыргызстандын Инвестициялар боюнча улуттук агенттиги менен БУУ инвестициялык саясатты өркүндөтүү, инвесторлордун укуктарын коргоо жана туруктуу өнүгүү жаатында кызматташууну талкуулашты. Мекеменин маалыматында айтылышынча, маселе бир күн мурун агенттиктин башчысынын орун басары Дамирбек Бикуловдун БУУнун Кыргызстандагы туруктуу координатору Брайан Уильямс менен жолугушуусунда көтөрүлгөн.

Тараптар 2027-2030-жылдарга карата инвестиция тартуу концепциясын, агенттикти өнүктүрүү стратегиясын жана инвестиция тартуу программасын иштеп чыгуу маселелерин карашты. Ошондой эле инвестициялык климатты жакшыртуу, мамлекет менен бизнестин диалогун өнүктүрүү жана инфраструктуралык, социалдык долбоорлорго жеке капиталды тартуу талкууланды.

Тараптар ошондой эле БУУнун Кыргызстандагы туруктуу өнүгүү боюнча кызматташтык программасын 2028-2032-жылдарга даярдоодо улуттук инвестициялык артыкчылыктарды эске алуу жана туруктуу өнүгүү максаттарына жетүүдө жеке сектордун катышуусун кеңейтүү маселелерин карашты. Жолугушуунун жыйынтыгында тараптар кызматташтыкты улантууга жана биргелешкен демилгелерди даярдоого кызыкдар экенин билдиришти.