Кыргызстандын Социалдык фонду 2027-жылдан баштап пенсияларды көтөрүүнү сунуштады, бирок баарына эмес

Кыргыз Республикасынын Социалдык фонду 2026-жылдын 28-октябрында пенсиялардын, үстөк акылардын жана компенсациялардын жаңы өлчөмдөрүн белгилеген өкмөт токтомунун долбоорун коомдук talkuuga чыгарды. Документ 2027-жылдын 1-январынан тартып күчүнө кириши пландалууда.

Бул ченемдик акт 2026-жылдын 21-октябрында президент Садыр Жапаровдун жарандардын айрым категорияларын мамлекеттик колдоо жөнүндөгү жарлыгынын негизинде иштелип чыккан. Долбоорго ылайык, мөөнөттүү аскердик кызматтагылар үчүн майыптык боюнча минималдуу пенсия 12 миң 300 сомго белгиленет. I топтогу майыптар үчүн төлөм 9 миң 500 сом, III топ үчүн 5 миң сом болот.

«Эне-баатыр» же «Баатыр эне» ордени менен сыйланган энелерге ай сайын 5 миң сом үстөк акы берилет. Ата-энесинин бирин жоготкон ар бир бала үчүн негизги пенсия бөлүгү 5 миң сом, ата-энесинин экөөн тең жоготкондор үчүн 8 миң сом болот.

Чернобыл АЭСинде жана башка атом объектилеринде авариянын кесепеттерин жоюучуларга өзгөчө компенсациялык төлөмдөр каралган. Пенсиясы 12 миң 300 сомдон ашкан жоюучуларга ай сайын 1 миң сом үстөк акы төлөнөт. Аз төлөм алгандарга 12 миң 300 сомго чейинки айырма, бирок кеминде 1 миң сом төлөнөт. Бардык чыгым республикалык бюджеттен каржыланат.