Кыргызстан өнөр жайды өнүктүрүү банкын түзүүнү сунуштап жатат

Кыргызстандын Экономика министрлиги «Кыргыз Республикасынын өнөр жай өнүктүрүү банкы жөнүндө» мыйзам долбоорун иштеп чыгып, коомдук талкуулоого чыгарды. Долбоор ишканаларды узак мөөнөттүү каржылоого жана өнөр жайды технологиялык жаңылоого багытталган атайын мамлекеттик институт түзүүнү камтыйт.

Банк мамлекеттин 100 пайыз катышуусу менен ачык акционердик коом түрүндө түзүлөт, ал эми акционердин ыйгарым укуктарын өкмөт ишке ашырат. Мыйзам долбооруна ылайык, банкка банктар жана банк ишмердигин жөнгө салуу жөнүндөгү мыйзамдын жалпы талаптары колдонулбайт. Анын Улуттук банктын лицензиясы талап кылынбайт, жөнгө салуучу орган ага пруденциалдык көзөмөл жүргүзбөйт. Банкка жеке адамдардын депозиттерин тартууга, калкка кызмат көрсөтүүгө жана өнөр жайды өнүктүрүү менен байланышпаган ишмердүүлүк менен алектенүүгө тыюу салынат.

Каржылоо боюнча чечимдер көз карандысыз экспертизага негизделет. Банктын натыйжалуулугу финансылык жыйынтыктар менен гана эмес, жеке инвестициялардын көлөмү, өндүрүш кубаттуулуктары, өнөр жай экспорту, импортту алмаштыруу жана жаңы жумуш орундары боюнча бааланат. Кыргызстанда өзгөчө мыйзам менен жөнгө салынуучу Мамлекеттик өнүктүрүү банкы иштеп жатат, ал дагы Улуттук банктын лицензиясыз иштейт.