Қырғызстан өнеркәсіпті дамыту банкін құруды ұсынып отыр

Қырғызстанның Экономика министрлігі «Қырғыз Республикасының өнеркәсіпті дамыту банкі туралы» заң жобасын әзірлеп, қоғамдық талқылауға шығарды. Жоба кәсіпорындарды ұзақ мерзімді қаржыландыруға және өнеркәсіпті технологиялық жаңғыртуға бағытталған арнайы мемлекеттік институт құруды көздейді.

Банк мемлекеттің 100 пайыз қатысуымен ашық акционерлік қоғам түрінде құрылады, ал акционердің өкілеттігін үкімет жүзеге асырады. Заң жобасына сәйкес, банкке банктер және банк қызметі туралы заңның жалпы талаптары қолданылмайды. Оған Ұлттық банктің лицензиясы қажет емес, реттеуші орган оған пруденциалдық бақылау жүргізбейді. Банкке жеке тұлғалардың депозиттерін тартуға, халыққа қызмет көрсетуге және өнеркәсіптік дамуға қатысы жоқ қызметпен айналысуға тыйым салынады.

Қаржыландыру туралы шешімдер тәуелсіз сараптамаға негізделеді. Банк тиімділігі тек қаржылық нәтижелермен емес, жеке инвестициялардың көлемі, өндірістік қуаттар, өнеркәсіптік экспорт, импортты алмастыру және жаңа жұмыс орындары арқылы бағаланады. Қырғызстанда ерекше заңмен реттелетін Мемлекеттік даму банкі бар және ол да Ұлттық банк лицензиясыз жұмыс істейді.