Qırğızıstan sənaye üçün yeni inkişaf bankı yaratmağı planlaşdırır

Qırğızıstan İqtisadiyyat Nazirliyi "Qırğız Respublikasının Sənaye İnkişaf Bankı haqqında" qanun layihəsini hazırlayaraq ictimai müzakirəyə çıxarıb. Layihə müəssisələrə uzunmüddətli maliyyələşdirmə və sənayenin texnoloji modernizasiyası üçün yeni dövlət institutunun yaradılmasını nəzərdə tutur.

Bank 100 faiz dövlət payı ilə açıq səhmdar cəmiyyəti şəklində yaradılacaq, səhmdar hüquqlarını isə hökumət həyata keçirəcək. Layihəyə görə, bank ümumi bank qanunvericiliyinin bəzi tələblərinə tabe olmayacaq, Milli Bankın lisenziyasına ehtiyac duymayacaq və tənzimləyici orqan tərəfindən ehtiyati nəzarətə cəlb olunmayacaq. Eyni zamanda bankın fiziki şəxslərin depozitlərini cəlb etməsi, əhaliyə xidmət göstərməsi və sənaye inkişafı ilə bağlı olmayan fəaliyyətlə məşğul olması qadağan ediləcək.

Maliyyələşdirmə qərarlarının müstəqil ekspertizaya əsaslanması, səmərəliliyin isə təkcə maliyyə nəticələri ilə deyil, özəl investisiyaların həcmi, istehsal gücləri, sənaye ixracı, idxalı əvəzləmə və yeni iş yerlərinin sayı ilə ölçülməsi planlaşdırılır. Ölkədə artıq ayrıca qanunla tənzimlənən Dövlət Inkişaf Bankı fəaliyyət göstərir.