Өзбекстан менен Түркия бизнести колдоо боюнча кеңеш түзүү жөнүндө келишимге кол койду

Өзбекстан Президенти Шавкат Мирзиёев жана Түркия Президенти Режеп Тайып Эрдоган Анкарадагы сүйлөшүүлөрдүн жыйынтыгы боюнча Бизнести колдоо боюнча жогорку деңгээлдеги кеңеш түзүү жөнүндө келишимге кол койду. Бул жөнүндө мамлекет жетекчисинин басма сөз кызматы билдирди.

Ошондой эле ар кандай багыттарды камтыган эки тараптуу документтердин топтому кол коюлду. Алардын арасында преференциалдык соода келишими алкагында товарлар тизмесин кеңейтүү жөнүндө протокол; социалдык камсыздоо жөнүндө өкмөттөр аралык келишим жана аны ишке ашыруу боюнча административдик келишим; 2022-жылдын 29-мартында кол коюлган, мамлекеттик чек аралар аркылуу товарлар жана транспорт каражаттарынын өтүшү жөнүндө алдын ала маалымат алмашуу протоколуна өзгөртүүлөр киргизүү жөнүндө кошумча протокол бар.

Билдирүүдө айтылгандай, кол коюлган документтер соода-экономикалык кызматташтыкты андан ары кеңейтүүгө, ишкерлер үчүн ыңгайлуу шарттар түзүүгө жана эки өлкөнүн жарандарынын социалдык укуктарын натыйжалуу коргоого багытталган.