Өзбекстан мен Түркия бизнесті қолдау кеңесін құру туралы келісімге қол қойды

Өзбекстан Президенті Шавкат Мирзиёев пен Түркия Президенті Режеп Тайып Ердоған Анкарадағы келіссөздердің қорытындысы бойынша Бизнесті қолдау жөніндегі жоғары деңгейдегі кеңес құру туралы келісімге қол қойды. Бұл туралы мемлекет басшысының баспасөз қызметі хабарлады.

Сондай-ақ әртүрлі бағыттарды қамтитын екіжақты құжаттар топтамасына қол қойылды. Олардың арасында преференциялық сауда келісімі аясында тауарлар тізімін кеңейту туралы хаттама; әлеуметтік қамсыздандыру туралы үкіметаралық келісім және оны іске асыру жөніндегі әкімшілік келісім; 2022 жылғы 29 наурызда қол қойылған, мемлекеттік шекаралар арқылы тауарлар мен көлік құралдарының өтуі туралы алдын ала ақпарат алмасу хаттамасына өзгерістер енгізу туралы қосымша хаттама бар.

Хабарда айтылғанындай, қол қойылған құжаттар сауда-экономикалық ынтымақтастықты одан әрі кеңейтуге, кәсіпкерлер үшін қолайлы жағдай жасауға және екі ел азаматтарының әлеуметтік құқықтарын тиімді қорғауға бағытталған.