Кыргызстан – Казакстан: товар жүгүртүү 8 айда 1,7 млрд долларга жетти

Кыргызстан менен Казакстандын ортосундагы товар жүгүртүү үстүбүздөгү жылдын сегиз айында 19,2 пайызга өсүп, 1,7 млрд долларды түздү. Бул тууралуу Казакстандын премьер-министри Олжас Бектенов Кыргыз-казак өкмөттөр аралык кеңешинин 14-жыйынында билдирди.

Анын айтымында, өткен жылы эки өлкөнүн ортосундагы товар жүгүртүү 2,3 млрд долларга жеткен. Мамлекет башчыларынын максаты — бул көрсөткүчтү 3 млрд долларга жеткирүү. «Казакстан үчүн Кыргызстан жөн гана коңшу мамлекет эмес, маанилүү соода-экономикалык өнөктөш», — деди Бектенов, транзит, айыл чарба жана экономиканын башка тармактарындагы кызматташтыкты тереңдетүүнүн маанилүү экенин белгилеп.

Ошондой эле чек арага жакын аймактардагы соодага, транспорттук байланыштарды кеңейтүүгө жана суу ресурстарын адилеттүү пайдаланууга өзгөчө маани берилип жатканы айтылды. Бектенов VI Дүйнөлүк көчмөндөр оюндарынын жогорку деңгээлде өткөрүлүшү менен кыргыз элин куттуктады. Сапардын алкагында өткөн аймактар аралык кызматташтыктын экинчи форумунда 14 документке кол коюлду.