Qirgʻiziston-Qozogʻiston savdo aylanmasi 8 oyda 1,7 milliard dollarga yetdi

Qirgʻiziston va Qozogʻiston oʻrtasidagi savdo aylanmasi joriy yilning sakkiz oyida 19,2 foizga oshib, 1,7 milliard dollarga yetdi. Bu haqda Qozogʻiston Bosh vaziri Oljas Bektenov Qirgʻiz-qozogʻiston hukumatlararo kengashining 14-yigʻilishida maʼlum qildi.

Bektenovning aytishicha, oʻtgan yili ikki mamlakat oʻrtasidagi savdo hajmi 2,3 milliard dollarga yetgan. Davlat rahbarlarining oldiga qoʻygan maqsadi esa bu koʻrsatkichni 3 milliard dollarga yetkazish. U Qozogʻiston uchun Qirgʻiziston shunchaki qoʻshni davlat emas, balki muhim savdo-iqtisodiy hamkor ekanini taʼkidladi. Tranzit, qishloq xoʻjaligi va iqtisodiyotning boshqa tarmoqlaridagi hamkorlikni chuqurlashtirish muhimligi aytildi.

Bektenov, shuningdek, chegara hududlaridagi savdoga, transport aloqalarini kengaytirishga va suv resurslaridan adolatli foydalanishga alohida eʼtibor berilayotganini qayd etdi. U qirgʻiz xalqini VI Jahon koʻchmanchilar oʻyinlarining yuqori darajada oʻtkazilishi bilan tabrikladi. Safar doirasida oʻtkazilgan hududlararo hamkorlikning ikkinchi forumida 14 ta hujjat imzolandi.