Токаев хуситтердин Сауд Арабиясына чабуулдарын айыптады

Президент Касым-Жомарт Токаев Түрк мамлекеттери уюмунун 13-чү саммитиндеги сөзүндө хуситтердин Сауд Арабиясына жасаган чабуулдарын айыптап, мындай аракеттерди токтотууга чакырды. Tengrinews.kz Акордого шилтеме кылып кабар берди.

Токаев Режеп Тайып Эрдогандын демилгеси менен ачылган Түрк мамлекеттери уюмунун аллеясын атап өттү. Ал дүйнөдөгү геосаясий кырдаал курчуп баратканын, айрыкча Ормуз кысыгынын айланасындагы тирешүү соода жана транспорт-логистика байланыштарына терс таасир тийгизип жатканын айтты. Казакстан бир тууган Сауд Арабиясына каршы негизсиз чабуулга нааразылык билдиргенин белгиледи.

Йеменде иш алып барган куралдуу топ «Ансар Алла» (хуситтер) Сауд Арабиясы колдогон өкмөт күчтөрү менен кагылышып келет. Иран хуситтерди колдойт. Тараптардын ортосундагы аскер кагылышуусу төрт жылдык тынчтыктан кийин июлдун ортосунда кайра жанданды. 28-октябрда хуситтер Сауд Арабиясынын түштүгүндөгү аба базаларындагы аскер-транспорт учактарына, коргонуу министрлигинин имаратына жана өлкөнүн чыгышындагы Рас-Таннура мунай иштетүүчү заводуна ракета менен соккусу урганын билдирди.