Gürcüstan və Azərbaycan sərhəd delimitasiyası və demarkasiyasını sürətləndirməyə razılaşdı

Gürcüstan və Azərbaycan sərhədin delimitasiyası və demarkasiyası prosesini sürətləndirmək barədə razılığa gəliblər. Oxu.Az "Report"a istinadən xəbər verir ki, bu barədə Gürcüstanın Baş naziri İrakli Kobaxidze jurnalistlərə açıqlamasında bildirib.

Onun sözlərinə görə, Keşikçidağ (Qareci) monastırı və ətraf ərazi ilə bağlı məsələlər də müzakirə olunub. Məsələ Azərbaycan və Gürcüstan arasında İqtisadi Əməkdaşlıq üzrə Hökumətlərarası Komissiyanın 11-ci iclasında və iki ölkənin baş nazirlərinin ikitərəfli görüşündə müzakirə edilib.

Kobaxidze son illər sərhədin delimitasiyası və demarkasiyası baxımından irəliləyiş olmadığını bildirib. Təxminən 15 razılığa gəlinməyən hissənin olduğunu və onların hamısı üzrə fəal işləmək lazım olduğunu vurğulayıb. Əsas məqsədin məsələnin prinsipial həllinə nail olmaq olduğunu, Azərbaycan tərəfinin isə prosesin sürətləndirilməsi ilə bağlı müsbət və səmimi yanaşma nümayiş etdirdiyini qeyd edib.