Өзбекстандагы Навои жылуулук электр станциясы 650 мегаваттык жаңы буу-газ курулмасын куруп жатат

Өзбекстанда «Навои жылуулук электр станциясы» АК кубаттуулугу 650 мегаватт болгон жаңы буу-газ курулмасын куруп жатат. Учурда курулуш жана монтаж иштери уланууда.

Долбоор ишке киргенден кийин жылына 4 миллиард 786 миллион киловатт-саат электр энергиясы өндүрүлөт. Бул туруктуу электр менен камсыздоого мүмкүнчүлүк берет. Учурда курулуш процессине 4700 жергиликтүү жана чет элдик адис, ошондой эле 185 атайын техника тартылган.

Долбоордун жалпы наркы 786,7 миллион доллар. Үчүнчү буу-газ курулмасында Япониянын компаниялары заманбап газ жана буу турбиналарын, утилизатор казандарды орнотууда. Ишкананын жооптуу кызматкери Баходир Жамолов курулуштун эң маанилүү баскычка жеткенин, негизги көңүл түтүк тармактарына жана электр иштерине бурулгандыгын айтты. Сынак иштерин декабрь айында жүргүзүү пландаштырылган.