ABŞ-nyň döwlet sekretary Marko Rubionyň Samarkant sapary 19-njy oktýabrda geçiriler

19-njy oktýabrda Samarkantda Orta Aziýa ýurtlarynyň we ABŞ-nyň daşary işler ministrleriniň "C5+1" formatyndaky duşuşygy geçiriler. Muny Özbegistanyň Daşary işler ministriniň matbugat sekretary Omonulla Faýziýew habar berdi. Duşuşyga Özbegistanyň, Gazagystanyň, Gyrgyzystanyň, Täjigistanyň we Türkmenistanyň daşary işler ministrleri, şeýle hem ABŞ-nyň döwlet sekretary Marko Rubio gatnaşar.

şol gün Özbegistanyň daşary işler ministri Bahtiýor Saidow we Rubio iki ýurduň arasyndaky giňeldilen strategik hyzmatdaşlyk boýunça Dialogyň birinji tapgyryny geçirer. Taraplar strategik hyzmatdaşlygy çuňlaşdyrmagy, syýasy, söwda-ykdysady we maýa goýum hyzmatdaşlygyny giňeltmegi, şeýle hem sebitdäki we halkara meseleleri ara alyp maslahatlaşarlar. Şeýle hem ABŞ-nyň we Orta Aziýanyň telekeçilik toparlarynyň wekilleriniň gatnaşmagynda duşuşyklar meýilleşdirilýär.

Sentýabr aýynda Günorta we Orta Aziýa boýunça ABŞ Prezidentiniň ýörite wekili Serhio Gor Rubionyň 100-den gowrak amerikan kompaniýasynyň wekillerinden ybarat toparyň ýolbaşçylygyny alajagyny habar beripdi. Goryň sözlerine görä, C5+1 duşuşygynda esasy üns sebitara ykdysady baglanyşyklary çuňlaşdyrmaga, energiýa howpsuzlygyny pugtalandyrmaga we sebitiň möhüm meselelerine bilelikde çözgütler tapmaga gönükdiriler.