AQSH davlat kotibi Marko Rubioning Samarqandga tashrifi 19-oktyabrga rejalashtirilgan

19-oktyabr kuni Samarqandda Markaziy Osiyo davlatlari va AQSH tashqi ishlar idoralari rahbarlarining "C5+1" formatidagi uchrashuvi boʻlib oʻtadi. Bu haqida Oʻzbekiston Tashqi ishlar vaziri matbuot kotibi Omonulla Fayziyev xabar berdi. Uchrashuvda Oʻzbekiston, Qozogʻiston, Qirgʻiziston, Tojikiston va Turkmaniston tashqi ishlar vazirlari hamda AQSH davlat kotibi Marko Rubio ishtirok etadi.

Shu kuni Oʻzbekiston Tashqi ishlar vaziri Baxtiyor Saidov va Rubio ikki davlat oʻrtasidagi kengaytirilgan strategik sheriklik boʻyicha Dialogning birinchi raundini oʻtkazadi. Tomonlar strategik sheriklikni chuqurlashtirish, siyosiy, savdo-iqtisodiy va investitsiya hamkorligini kengaytirish hamda mintaqaviy va xalqaro masalalarni muhokama qiladi. Shuningdek, AQSH va Markaziy Osiyo biznes doiralari vakillari ishtirokida uchrashuvlar rejalashtirilgan.

Sentyabr oyida Janubiy va Markaziy Osiyo boʻyicha AQSH Prezidentining maxsus vakili Sergio Gor Rubio 100 dan ortiq amerikalik kompaniya vakillaridan iborat delegatsiyaga rahbarlik qilishini maʼlum qilgan edi. Gorning soʻzlariga koʻra, C5+1 uchrashuvida asosiy eʼtibor mintaqaviy iqtisodiy aloqalarni chuqurlashtirish, energetik xavfsizlikni mustahkamlash va mintaqaning dolzarb masalalari boʻyicha birgalikdagi yechimlarga qaratiladi.