Marko Rubionun Səmərqəndə səfəri oktyabrın 19-da gözlənilir

Oktyabrın 19-da Səmərqənddə Mərkəzi Asiya ölkələrinin və ABŞ-ın xarici işlər nazirlərinin "C5+1" formatında görüşü keçiriləcək. Bu barədə Özbəkistan Xarici İşlər Nazirliyinin mətbuat katibi Omonulla Fayziyev məlumat verib. Görüşdə Özbəkistan, Qazaxıstan, Qırğızıstan, Tacikistan və Türkmənistanın xarici işlər nazirləri, habelə ABŞ dövlət katibi Marko Rubio iştirak edəcək.

Eyni gün Özbəkistan XİN-in başçısı Bəxtiyor Səidov və Marko Rubio iki ölkə arasında genişlənmiş strateji tərəfdaşlıq üzrə Dialoqun ilk raundunu keçirəcəklər. Tərəflər strateji tərəfdaşlığın dərinləşdirilməsi, siyasi, ticarət-iqtisadi və investisiya əməkdaşlığının genişlənməsi, habelə regional və beynəlxalq məsələləri müzakirə edəcəklər. Həmçinin ABŞ və Mərkəzi Asiya ölkələrinin biznes dairələrinin nümayəndələri ilə görüşlər nəzərdə tutulub.

Sentyabr ayında ABŞ Prezidentinin Cənubi və Mərkəzi Asiya üzrə xüsusi elçisi Serxio Qor bildirmişdi ki, dövlət katibi 100-dən çox amerikan şirkətinin nümayəndələrindən ibarət heyətə rəhbərlik edəcək. Qorun sözlərinə görə, "C5+1" görüşində əsas diqqət regional iqtisadi əlaqələrin dərinləşdirilməsinə, enerji təhlükəsizliyinin möhkəmləndirilməsinə və regionun aktual məsələlərinə birgə həll yollarının tapılmasına yönəldiləcək.