АКШ мамлекеттик катчысы Марко Рубионун Самарканд сапары 19-октябрга күтүлүүдө

Самарканда 19-октябрда Борбордук Азия өлкөлөрү менен АКШнын тышкы иштер ведомстволорунун жетекчилеринин «С5+1» форматындагы жолугушуусу өтөт. Бул тууралуу Өзбекстандын Тышкы иштер министринин басма сөз катчысы Омонулла Файзиев билдирди. Жолугушууга Өзбекстандын, Казакстандын, Кыргызстандын, Тажикстандын жана Түркмөнстандын тышкы иштер министрлери, ошондой эле АКШнын мамлекеттик катчысы Марко Рубио катышат.

Ушул күнү Өзбекстандын Тышкы иштер министри Бахтиёр Саидов менен Марко Рубио эки өлкөнүн ортосундагы кеңейтилген стратегиялык өнөктөштүк боюнча Диалогдун биринчи раундун өткөрөт. Тараптар стратегиялык өнөктөштүктү тереңдетүүнү, саясий, соода-экономикалык жана инвестициялык кызматташтыкты кеңейтүүнү, ошондой эле аймактык жана эл аралык маселелерди талкуулашат. Ошондой эле АКШ менен Борбордук Азиянын бизнес чөйрөсүнүн өкүлдөрүнүн катышуусу менен жолугушуулар пландалууда.

Сентябрда Түштүк жана Борбордук Азия боюнча АКШ Президентинин атайын элчиси Сержио Гор Рубионун 100дөн ашык америкалык компаниянын өкүлдөрүнөн турган делегацияга жетекчилик кылаарын билдирген. Гордун айтымында, «С5+1» жолугушуусунда негизги көңүл аймактык экономикалык байланыштарды тереңдетүүгө, энергетикалык коопсуздукту бекемдөөгө жана аймактын актуалдуу маселелери боюнча биргелешкен чечимдерге бурулат.