Özbegistanda suwlaşdyrylan gaz üpjünçiliginde döwlet monopoliýasy ýatyrylýar

Özbegistan 2027-nji ýylda suwlaşdyrylan gaz üpjünçiligi pudagyny ýurt boýunça hususy sektora bermegi maksat edinýär. Prezident Şawkat Mirziýoýew muny ýangyç-energetika pudagynyň maýadarlary bilen geçirilen açyk gepleşikde mälim etdi. Häzirki wagtda ýurtda 3 million 800 müň öý hojalygy suwlaşdyrylan gazdan peýdalanýar. Öňki döwlet monopoliýasynda bolan bu ulgama bazar mehanizmleri ädim-ädim girizilýär.

Andyjan welaýatynda telekeçileriň gatnaşmagynda pilot taslama başlandy. Indiki ýyl bu tejribäni ýurt boýunça giňeltmek göz öňünde tutulýar. Prezident gaz üpjünçiliginiň üznüksizligini, howpsuzlygy we hyzmat hilini esasy ölçeg diýip belleýär.

Gepleşikde neft-gaz pudagynda geologiýa-gözleg işlerini giňeltmek meselesi hem seredildi. Häzirki wagtda Ustýurt sebitindäki alty maýa goýum blogunda Socar we British Petroleum kompaniýalary bilen gözleg işleri geçirilýär. Daşary ýurt maýadarlaryna hödürlemek üçin beýleki sebitlerde ýene 128 blok taýýarlanypdyr; deslapky hasaplamalara görä, bu bloklarda 5,8 trillion kub metr gaz we 560 million tonna suwuk uglewodorod serişdeleri bar.