Өзбекстанда сұйытылған газ жеткізуде мемлекеттік монополия тоқтатылады

Өзбекстан 2027 жылы сұйытылған газ жеткізу саласын ел бойынша жеке секторға беруді көздеп отыр. Бұл туралы Президент Шавкат Мирзиёев отын-энергетика саласының инвесторларымен өткен ашық кездесуде мәлімдеді. Қазіргі уақытта елде 3 миллион 800 мың үй шаруашылығы сұйытылған газды пайдаланады. Бұрын мемлекеттік монополияда болған бұл жүйеге нарықтық тетіктер біртіндеп енгізілуде.

Андижан облысында кәсіпкерлердің қатысуымен пилоттық жоба басталған. Келесі жылы бұл тәжірибені республика бойынша кеңейту жоспарланған. Президент газбен қамтамасыз етудің үзіліссіздігін, қауіпсіздікті және қызмет көрсету сапасын басты өлшемдер ретінде атап өтті.

Кездесуде мұнай-газ саласында геологиялық барлау жұмыстарын кеңейту мәселесі де қаралды. Қазір Үстірт аймағындағы алты инвестициялық блокта Сокар және Бритиш Петролеум компанияларымен барлау жұмыстары жүргізілуде. Шетелдік инвесторларға ұсыну үшін басқа аймақтарда тағы 128 блок дайындалған; алдын ала есептеулер бойынша, бұл блоктарда 5,8 триллион текше метр газ және 560 миллион тонна сұйық көмірсутек ресурстары бар.