Oʻzbekistonda suyultirilgan gaz yetkazib berishda davlat monopoliyasi tugatiladi

Oʻzbekistonda 2027-yilda suyultirilgan gaz yetkazib berish sohasini butun respublika boʻylab xususiy sektorga berish maqsad qilingan. Bu haqda Prezident Shavkat Mirziyoyev yoqilgʻi-energetika sohasidagi investorlar bilan oʻtkazilgan ochiq muloqotda maʼlum qildi. Hozir mamlakatda 3 million 800 ming xonadon suyultirilgan gazdan foydalanmoqda. Ilgari davlat monopoliyasida boʻlgan ushbu tizimga bosqichma-bosqich bozor mexanizmlari joriy etilmoqda.

Andijon viloyatida tadbirkorlar ishtirokidagi pilot loyiha boshlangan. Kelgusi yil bu amaliyot butun respublika boʻylab kengaytiriladi. Prezident gaz taʼminotining uzluksizligi, xavfsizlik va xizmat sifatini eng muhim mezonlar sifatida taʼkidladi.

Muloqotda neft-gaz sohasida geologiya-qidiruv ishlarini kengaytirish masalasi ham koʻrib chiqildi. Hozir Ustyurt mintaqasidagi oltita investitsiya blokida Socar va British Petroleum kompaniyalari bilan qidiruv ishlari olib borilmoqda. Xorijiy investorlarga taklif etish uchun boshqa hududlarda yana 128 ta blok tayyorlangan; dastlabki hisob-kitoblarga koʻra, ularda 5,8 trillion kub metr gaz va 560 million tonna suyuq uglevodorod resurslari mavjud.