Özbegistanda çagalary narkotik ulanmaga çekenler 10 ýyla çenli azatlykdan mahrum edilip biler

Özbegistanda ýaş ýetmedikleri narkotik ulanmaga çekenleriň 10 ýyla çenli azatlykdan mahrum edilip biljekdigi habar berildi. Bu düzgün çagalary zorluklardan goramagy güýçlendirmäge gönükdirilen kanunda kesgitlenýär we Prezident tarapyndan gol çekildi. Kanun esasynda ýaş ýetmedikleri narkotik we psihotrop maddalara çekendigi üçin jenaýat jogapkärçiligi ep-esli artyryldy.

Jenaýat kodeksiniň degişli maddalaryna girizilen üýtgeşmelere laýyklykda, ýaş ýetmedikleri alkogolly içgilere ýa-da akyl-irada işjeňligine täsir edýän maddalary ulanmaga çekendigi üçin jerime 150–250 baravara çenli ýokarlandyryldy. Şeýle hem 360–400 sagat mejburi jemgyýetçilik işleri, 3 ýyla çenli ahlak düzediş işleri, 3–5 ýyl azatlygy çäklendirmek ýa-da azatlykdan mahrum etmek jezasy ulanylyp biler.

Narkotik serişdeleri, psihotrop maddalar, olaryň analoglary ýa-da güýçli täsir edýän käbir maddalary ulanmaga çekeni üçin azatlykdan mahrum etmegiň möhleti 5–7 ýyl türme jezasyna çenli ýokarlandyryldy. Jenaýat gaýtalanan bolsa, iki ýa-da ondan köp ýaş ýetmedik şahsa garşy edilen bolsa, bilim edaralarynyň ýerinde edilen bolsa ýa-da adam ölümine ýa-da başga agyr netijelere getirse, günäkäre 7–10 ýyl azatlykdan mahrum etmek jezasy berilip biler. Şeýle hem 14 ýaşa ýetmedik çaga garşy jyns zorlugy edenler üçin 25 ýyla çenli azatlykdan mahrum etmek ýa-da ömürlik türme jezasy göz öňünde tutulýar.