Өзбекстанда балаларды есірткіге тартқандар 10 жылға дейін түрмеге қамалуы мүмкін

Өзбекстанда кәмелетке толмағандарды есірткіні қолдануға тартқандарды 10 жылға дейін бостандықтан айыру мүмкін екені хабарланды. Бұл туралы балаларды зорлық-зомбылықтан қорғауды күшейтуге бағытталған заңда көрсетілген. Президент қол қойған бұл заң аясында кәмелетке толмағандарды есірткі мен психотроптық заттарға тарту үшін қылмыстық жауапкершілік едәуір күшейтілді.

Қылмыстық кодекстің тиісті баптарына енгізілген өзгерістерге сәйкес, кәмелетке толмағандарды алкогольдік ішімдіктерді немесе ақыл-ес пен ерік әрекетіне әсер ететін заттарды қолдануға тартқаны үшін айыппұл мөлшері 150–250 базалық есептік көрсеткішке дейін ұлғайтылды. Сондай-ақ 360–400 сағат міндетті қоғамдық жұмыс, 3 жылға дейін түзеу жұмыстары, 3–5 жыл бостандықты шектеу немесе бостандықтан айыру жазасы қолданылуы мүмкін.

Есірткі құралдарын, психотроптық заттарды, олардың аналогтарын немесе күшті әсер ететін кейбір заттарды қолдануға тартқаны үшін бостандықтан айыру мерзімі 5 жылдан 7 жылға дейін түрме жазасына өзгертілді. Қылмыс қайталанса, екі немесе одан көп кәмелетке толмаған адамға қатысты жасалса, білім беру ұйымының аумағында жасалса немесе адам өліміне не басқа ауыр салдарға әкелсе, кінәлыға 7 жылдан 10 жылға дейін бостандықтан айыру жазасы тағайындалуы мүмкін. Сондай-ақ заңда 14 жасқа толмаған балаға қатысты жыныстық зорлық-зомбылық жасағандарға 25 жылға дейін бостандықтан айыру немесе өмір бойы түрме жазасы көзделгені хабарланды.