Özbəkistanda uşaqları narkotikə cəlb edənlər 10 ilədək həbs oluna bilər

Özbəkistanda yetkinlik yaşına çatmayanları narkotik istifadəsinə cəlb edənlərin 10 ilədək azadlıqdan məhrum edilə biləcəyi bildirilib. Bu qayda uşaqları zorakılıqdan qorumağa yönəlmiş qanunda müəyyənləşdirilib və Prezident tərəfindən imzalanıb. Qanun çərçivəsində yetkinlik yaşına çatmayanları narkotik və psixotrop maddələrə cəlb etməyə görə cinayət məsuliyyəti kəskin artırılıb.

Cinayət məcəlləsində edilən dəyişikliklərə əsasən, yetkinlik yaşına çatmayanları spirtli içkilər və ya zehni-iradi fəaliyyətə təsir edən maddələrin istifadəsinə cəlb etməyə görə cərimə 150–250 baza məbləğinədək artırılıb. Bundan əlavə, 360–400 saat məcburi ictimai işlər, 3 ilədək əxlaq düzəltmə işləri, 3–5 il azadlığın məhdudlaşdırılması və ya azadlıqdan məhrumetmə tətbiq oluna bilər.

Narkotik vasitələri, psixotrop maddələr və ya onların analoqlarının istifadəsinə cəlb etməyə görə azadlıqdan məhrumetmə müddəti 5–7 il həbsə qaldırılıb. Cinayət təkrarlanarsa, bir neçə və ya daha çox yetkinlik yaşına çatmayan şəxsə qarşı, təhsil müəssisəsi ərazisində törədilərsə, yaxud insan ölümü və ya digər ağır nəticələrə səbəb olarsa, 7–10 il azadlıqdan məhrumetmə təyin oluna bilər. Həmçinin 14 yaşına çatmamış uşağa qarşı cinsi zorakılıq törədənlər üçün 25 ilədək azadlıqdan məhrumetmə və ya ömürlük həbs nəzərdə tutulub.