Oʻzbekistonda voyaga yetmaganlarni giyohvandlikka jalb qilganlar 10 yilgacha qamalishi mumkin

Oʻzbekistonda voyaga yetmaganlarni giyohvandlikka jalb qilganlar 10 yilgacha ozodlikdan mahrum etilishi mumkin. Bu haqda bolalarni zoʻravonlikdan himoya qilishni kuchaytirishga qaratilgan qonunda belgilandi. Prezident tomonidan imzolangan ushbu qonun doirasida voyaga yetmaganlarni giyohvandlik va psixotrop moddalarga jalb etganlik uchun jinoiy javobgarlik keskin kuchaytirildi.

Jinoyat kodeksining tegishli moddalariga kiritilgan oʻzgarishlarga koʻra, voyaga yetmaganlarni spirtli ichimliklar yoki aqliy-irodaviy faoliyatga taʼsir qiluvchi moddalarni isteʼmol qilishga jalb etganlik uchun jarima miqdori 150 – 250 baravargacha oshirildi. Shuningdek, 360 soatdan 400 soatgacha majburiy jamoat ishlari, 3 yilgacha axloq tuzatish ishlari yoki 3 yildan 5 yilgacha ozodlikni cheklash yoxud ozodlikdan mahrum qilish jazosi qoʻllanishi mumkin.

Giyohvandlik vositalari, psixotrop moddalar, ularning analoglari yoki kuchli taʼsir qiluvchi moddalarning ayrim turlarini isteʼmol qilishga jalb etganlik uchun ozodlikdan mahrum qilish muddati oshirilib, endi 5 yildan 7 yilgacha qamoq jazosi belgilanishi mumkin. Agar jinoyat takroran sodir etilsa, ikki yoki undan ortiq voyaga yetmagan shaxsga nisbatan amalga oshirilsa, taʼlim muassasasi hududida sodir etilsa yoxud inson oʻlimi yoki boshqa ogʻir oqibatlarga olib kelsa, aybdorga 7 yildan 10 yilgacha ozodlikdan mahrum qilish jazosi tayinlanishi mumkin. Shuningdek, 14 yoshga toʻlmagan bolaga nisbatan jinsiy zoʻravonlik sodir etgan shaxslarga 25 yilgacha ozodlikdan mahrum qilish yoki umrbod qamoq jazosi tayinlanishi koʻzda tutilgani xabar qilingan.