BP: “Şahdeniz” taslamasy çäginde deňizde gurluşyk işlerine başlandy

BP Azerbaýjandaky “Şahdeniz” gaz-kondensat ýatagynda 2,9 milliard ABŞ dollaryna deň “Şahdeniz Kompressiýa” (ŞDK) taslamasy boýunça deňizde gurluşyk işlerine başlanylandygyny habar berdi. Habary Report, BP Azerbaijan kompaniýasyna salgylanyp ýaýratdy.

Soňky birnäçe hepde içinde ŞDK platformasynyň düýpli blogunyň esasyny emele getirjek dört turba paýasynyň deňze daşalyp, gurnalmagy üstünlikli tamamlandy. Işler “Xankendi” suw aşagy gurluşyk gämisi arkaly ýerine ýetirildi. Her biri takmynan 70 metr uzynlykda, 108 dýuým diametrli we 292 tonna agramly paýalar BP-niň Hazarda şu wagta çenli gurnan iň uly diametrli turba paýalarydyr.

BP-niň maglumatyna görä, bu basgançagyň tamamlanmagy 2028-nji ýylyň birinji ýarymynda platformanyň düýpli blogyny gurnamaga ýol açýar. Taslamanyň esasy maksady “Şahdeniz” ýatagynda pes basyşly gaz gorlarynyň öndürilmegini üpjün etmek we ýatagyň gaz gaýtarylyş koeffisientini ýokarlandyrmakdyr. Taslama çäginde takmynan 50 milliard kub metr gaz we 25 million barrel kondensat öndüriljek. Gurluşygyň 2029-njy ýylda tamamlanmagy meýilleşdirilýär.