BP: «Шахдениз» жобасы аясында теңізде құрылыс жұмыстары басталды

BP Әзербайжандағы «Шахдениз» газ-конденсат кенішінде 2,9 миллиард АҚШ доллары құны бар «Шахдениз Компрессия» (ШДК) жобасы бойынша теңізде құрылыс жұмыстарын бастағанын хабарлады. Бұл туралы Report BP Azerbaijan компаниясына сілтеме жасап жазады.

Соңғы бірнеше апта ішінде ШДК платформасының тірек блогының негізін құрайтын төрт құбырлы тіректі теңізге тасымалдау және орнату сәтті аяқталды. Операциялар «Ханкенди» суасты құрылыс кемесі арқылы жүзеге асырылды. Әрқайсысының ұзындығы шамамен 70 метр, диаметрі 108 дюйм, салмағы 292 тонна болатын тіректер BP-дің Каспий теңізінде осы уақытқа дейін орнатқан ең үлкен диаметрлі құбырлы тіректері. Орнату барысында 188 тонналық арнайы суасты тірек рамасы пайдаланылды.

BP мәліметінше, бұл кезеңнің аяқталуы платформаның тірек блогын 2028 жылдың бірінші жартысында орнатуға жол ашады. Жобаның негізгі мақсаты — кеніштегі төмен қысымды газ қорларын өндіруді қамтамасыз ету және кеніштің газ беру коэффициентін арттыру. Жоба аясында шамамен 50 миллиард текше метр газ және шамамен 25 миллион баррель конденсат өндіріліп, экспортқа шығарылады. Құрылыс жұмыстарын 2029 жылы аяқтау жоспарланған.