BP: “Shohdeniz” loyihasi doirasida dengizda qurilish ishlariga start berildi

BP Ozarbayjondagi “Shohdeniz” gaz-kondensat konida 2,9 milliard AQSH dollari qiymatidagi “Shohdeniz Kompressiya” (ShDK) loyihasi doirasida dengizda qurilish ishlari boshlanganini maʼlum qildi. Xabar Report nashri tomonidan BP Azerbaijan kompaniyasiga tayanib yetkazildi.

Soʻnggi bir necha hafta ichida ShDK platformasining tayanch blokiga asos boʻladigan toʻrtta quvurli poyaning dengizga tashilishi va oʻrnatilishi muvaffaqiyatli yakunlandi. Ishlar “Xankandi” suv osti qurilish kemasi yordamida amalga oshirildi. Har biri taxminan 70 metr uzunlikda, 108 dyuym diametrli va 292 tonna ogʻirlikdagi poyalar BP ning Kaspiy dengizida hozirgacha oʻrnatgan eng katta diametrli quvurli poyalari hisoblanadi.

BP maʼlumotiga koʻra, bu bosqichning yakunlanishi 2028-yil birinchi yarmida tayanch blokini oʻrnatish uchun zamin yaratadi. Loyihaning asosiy maqsadi Shohdeniz konidagi past bosimli gaz zaxiralarini qazib olishni taʼminlash va konning gaz qaytarish koeffitsiyentini oshirishdir. Loyiha doirasida taxminan 50 milliard kubometr gaz va 25 million barrel kondensat qazib olinib eksport qilinadi. Qurilish ishlari 2029-yilda yakunlanishi rejalashtirilgan.