BP: “Şahdəniz” layihəsi çərçivəsində dənizdə tikinti işlərinə start verilib

BP, Azərbaycandakı “Şahdəniz” qaz-kondensat yatağında 2,9 milyard ABŞ dolları dəyərində “Şahdəniz Kompressiya” (ŞDK) layihəsi üzrə dənizdə tikinti işlərinə başlandığını bildirib. Xəbəri “Report” “BP Azerbaijan” şirkətinə istinadən verir.

Son bir neçə həftə ərzində ŞDK platformasının dayaq blokunun əsasını təşkil edəcək dörd boru payanın dənizə daşınması və quraşdırılması uğurla başa çatdırılıb. Əməliyyatlar “Xankəndi” sualtı tikinti gəmisi vasitəsilə həyata keçirilib. Hər biri təxminən 70 metr uzunluğunda, 108 düym diametrli və 292 ton çəkisi olan payalar BP-nin Xəzərdə indiyədək quraşdırdığı ən böyük diametrli boru payalardır.

BP-nin məlumatına görə, bu mərhələnin tamamlanması 2028-ci ilin birinci yarısında dayaq blokunun quraşdırılmasına zəmin yaradır. Layihənin əsas məqsədi “Şahdəniz” yatağında aşağı təzyiqli qaz ehtiyatlarının hasilatını təmin etmək və qazvermə əmsalını artırmaqdır. Layihə çərçivəsində təxminən 50 milyard kubmetr qaz və 25 milyon barel kondensat hasil ediləcək. Tikintinin 2029-cu ildə başa çatdırılması planlaşdırılır.