Bolalar farovonligiga investitsiyalar haqida Samarqand deklaratsiyasi qabul qilindi

Samarqandda oʻtkazilgan “Bolalar farovonligiga investitsiyalar” jahon sammiti oʻz ishini yakunladi. Sammit yopilishida Prezident huzuridagi Milliy ijtimoiy himoya agentligi birinchi direktor oʻrinbosari Shahnoza Mirziyoyeva Samarqand deklaratsiyasi qabul qilinganini eʼlon qildi.

Hujjat umumiy qarash, davlatlarning majburiyatlari, moliyalashtirish va hamkorlik boʻlimlaridan iborat. Hujjatda dunyo aholisining uchdan bir qismi bolalardan iborat ekani eslatilgan. Iqlim oʻzgarishi, mojarolar, majburiy koʻchish, iqtisodiy bosim va texnologik oʻzgarishlar tengsizlikni kuchaytirayotgani hamda bu inqirozlardan eng koʻp masʼuliyati eng kam boʻlgan bolalar azob chekayotgani qayd etilgan. Davlatlar milliy sharoitlar, ustuvorliklar va imkoniyatlarga muvofiq ijtimoiy himoya, zoʻravonlikdan himoya, onlayn xavfsizlik, erta yosh va taʼlim, sogʻliqni saqlash, bolalar saratoni, oila qoʻllab-quvvatlash hamda yoshlarni tayyorlash yoʻnalishlarida sakkizta majburiyat oladi.

YUNISEF Yevropa, Markaziy Osiyo, Yaqin Sharq va Shimoliy Afrika boʻyicha mintaqaviy direktori Edouard Beghin deklaratsiya umumiy yoʻnalishni belgilab berganini aytdi. Jahon banki Markaziy Osiyo mamlakatlari boʻyicha direktori Naji Benhassin esa hukumatlar resurslar bilan cheklangani va bolalarga investitsiya ustuvor ekani ochiq eʼlon qilinishi muhimligini taʼkidladi. Maʼruzachilar asosiy muammo berilgan vaʼdalar bilan ularning ijrosi oʻrtasidagi tafovut ekanini qayd etdi.