Özbegistanda iflas prosesindäki telekeçiler üçin aýratyn hasaplar açylar

Özbegistanyň Merkezi banky iflas prosesinde bolan telekeçileriň bank hasaplary bilen işlemek düzgünlerini üýtgetdi. Indi bu telekeçiler üçin reabilitasiýa, daşarky dolandyryş ýa-da işiň ýatyrylmagy wagtynda serişdeleri dolandyrmaga mümkinçilik berýän aýratyn hasaplar açylar.

Täze düzgünlere görä, esasy we goşmaça hasaplardaky ähli amallar togtadylar we pullar täze aýratyn hasaba geçiriler. Bu serişdeleri diňe müşderiniň ýa-da kazyýet dolandyryjysynyň töleg tabşyryklary esasynda ulanmak mümkin bolar. Bu çäreleriň bank prosedurlaryny ýönekeýleşdirmek we krizisde galan telekeçilere maliýe gözegçiligini saklamaga we işini dikeltmäge kömek etmek maksady bilen kabul edilendigi aýdylýar.

Üýtgeşmeler adaty raýatlara-da degişlidir. Indi ähli bank hasaplary barada maglumaty esasy hasap açylan banktan başga islendik bankdan almak mümkin. Mundan başga-da, hasap açylanda daşary ýurda syýahat üçin biometrik pasportdan peýdalanmaga rugsat berildi. Şol bir wagtyň özünde salgyt töleýjileriň hasaplaryny blokirlemek tertibi hem üýtgedi: salgyt edarasynyň karary bilen razylaşmadyk telekeçi arza berip biler we kazyýet ony üç gün içinde seljermeli.