Oʻzbekistonda bankrotlik jarayonidagi tadbirkorlar uchun maxsus hisobvaraqlar ochiladi

Oʻzbekiston Markaziy banki bankrotlik jarayonidagi tadbirkorlarning bank hisobvaraqlari bilan ishlash qoidalarini oʻzgartirdi. Endi bunday tadbirkorlar uchun reabilitatsiya, tashqi boshqaruv yoki biznesni tugatish davrida mablagʻlarni boshqarish imkonini beruvchi maxsus hisobvaraqlar ochiladi.

Yangi qoidalarga koʻra, asosiy va qoʻshimcha hisobvaraqlardagi barcha operatsiyalar toʻxtatiladi va pullar yangi maxsus hisobvaraqqa oʻtkaziladi. Mablagʻlardan faqat mijozning yoki sud boshqaruvchisining toʻlov topshirigʻi asosida foydalanish mumkin. Bu choralar bank jarayonlarini soddalashtirish hamda inqirozga uchragan tadbirkorlarga moliyaviy nazoratni saqlab qolish va faoliyatni tiklashda yordam berish maqsadida qabul qilingani aytilgan.

Oʻzgarishlar oddiy fuqarolarga ham taalluqli. Endi barcha bank hisobvaraqlari haqidagi maʼlumotni asosiy hisobvaraq ochilgan bankdan tashqari istalgan bankdan olish mumkin. Shuningdek, hisobvaraq ochishda chet elga sayohat uchun biometrik pasportdan foydalanishga ruxsat berilgan. Shu bilan birga, soliq toʻlovchilarning hisobvaraqlarini bloklash tartibi ham oʻzgardi: soliq organining qaroriga rozi boʻlmagan tadbirkor eʼtiroz bildirishi mumkin, uni esa sud uch kun ichida koʻrib chiqishi kerak.