Gruziýa we Merkezi Aziýa ýurtlarynyň daşary işler ministrleri Batumida duşuşdy

Gruziýa we Merkezi Aziýa ýurtlarynyň daşary işler ministrleriniň Batumida geçirilen ilkinji bilelikdäki duşuşygy tamamlandy. Duşuşyga Türkmenistanyň Ministrler Kabinetiniň başlygynyň orunbasary we daşary işler ministri Raşid Meredow, Gazagystanyň daşary işler ministri Muhtar Tleuberdi, Gyrgyzystanyň daşary işler ministri Jeenbek Kulubaýew, Täjigistanyň daşary işler ministri Sirojiddin Muhriddin we Özbegistanyň daşary işler ministri Bahtiýar Saidow gatnaşdy.

Ilkinji bilelikdäki duşuşykda Gruziýa bilen Merkezi Aziýa ýurtlarynyň arasyndaky hyzmatdaşlyk gatnaşyklarynyň dinamikasy ara alyndy. Umumy bähbitlere esaslanýan syýasy dialogyň we hyzmatdaşlygyň güýçlendirilmeginiň ähmiýeti nygtaldy.

Taraplar Ýewropa bilen Aziýanyň arasyndaky aragatnaşygy güýçlendirmekde Gruziýanyň we Merkezi Aziýa ýurtlarynyň roluny nygtap, Orta dalaň mümkinçiliklerinden doly peýdalanmagyň möhümdigine aýratyn üns berdi. Ykdysadyýet, söwda, ulag we turizm ýaly möhüm pudaklarda hyzmatdaşlygy çuňlaşdyrmagyň mümkinçilikleri seljerildi.