Грузия жана Борбордук Азия өлкөлөрүнүн тышкы иштер министрлери Батумиде жолукту

Грузия жана Борбордук Азия өлкөлөрүнүн тышкы иштер министрлеринин Батумидеги биринчи биргелешкен жолугушуусу аяктады. Жолугушууга Түркмөнстандын Министрлер Кабинетинин төрагасынын орун басары жана тышкы иштер министри Рашид Мередов, Казакстандын тышкы иштер министри Мухтар Тлеуберди, Кыргызстандын тышкы иштер министри Жээнбек Кулубаев, Тажикстандын тышкы иштер министри Сироджиддин Мухриддин жана Өзбекстандын тышкы иштер министри Бахтияр Саидов катышты.

Жолугушууда Грузия менен Борбордук Азия өлкөлөрүнүн ортосундагы өнөктөштүк мамилелеринин динамикасы талкууланды. Жалпы кызыкчылыктарга негизделген саясий диалогдун жана кызматташтыкты бекемдөөнүн маанилүүлүгү белгиленди.

Тараптар Европа менен Азиянын ортосундагы байланыштарды бекемдөөдө Грузия жана Борбордук Азия өлкөлөрүнүн ролун баса белгилеп, Орто коридордун потенциалын толук пайдалануунун маанилүүлүгүнө өзгөчө көңүл бурушту. Ошондой эле экономика, соода, транспорт жана туризм сыяктуу маанилүү тармактардагы кызматташтыкты тереңдетүү мүмкүнчүлүктөрү талданды.